National Vision News
 

ആര്‍ട്ടിക്കിള്‍ 370 ഒഴിവാക്കുമ്പോൾ കശ്മീരിൽ ഉണ്ടാവാൻ പോവുന്ന മാറ്റങ്ങൾ .

National Vision News 02:12 PM National News

ന്യൂഡൽഹി: ജമ്മു കശ്മീരിന് പ്രത്യേക അധികാരം നൽകുന്ന പദവി എടുത്ത് കളയാൻ തീരുമാനിച്ചിരിക്കുകയാണ് കേന്ദ്ര സർക്കാർ. കേന്ദ്ര ആഭ്യന്തര മന്ത്രി അമിത് ഷായാണ് ഇക്കാര്യം പ്രഖ്യാപിച്ചത്. കശ്മീരിന് പ്രത്യേക അധികാരം നൽകുന്ന ആർട്ടിക്കിൾ 370 ആണ് എടുത്ത് കളയാൻ പോവുന്നത്. ഇന്ത്യയുടെ ഭരണഘടന പ്രകാരം 1954 മുതൽ കശ്മീരിന് ഇത്തരത്തിൽ പ്രത്യേക അധികാരമുണ്ട്. ഇതാണ് ഇപ്പോൾ എടുത്ത് കളയാൻ തീരുമാനിച്ചിരിക്കുന്നത്.
ഇന്ത്യൻ ഭരണഘടനപ്രകാരം ജമ്മു കാശ്മീരിന് പ്രത്യേക പദവി നൽകുന്ന വകുപ്പാണ് 370. ഭരണഘടനയുടെ 21-ാം അനുച്ഛേദത്തിലാണ് ജമ്മു കാശ്മീരിന് പ്രത്യേക പദവി നൽകിക്കൊണ്ടുള്ള ഈ വകുപ്പ് നിലകൊള്ളുന്നത്. "താൽക്കാലികവും, മാറ്റം വരാവുന്നതും, പ്രത്യേക നിബന്ധനയുള്ളതുമായതാണ്" ഈ വകുപ്പ്. മറ്റ് സംസ്ഥാനങ്ങളുമായി ബന്ധപ്പെട്ട എല്ലാ വകുപ്പുകളും നിയമങ്ങളും ജമ്മു കാശ്മീരിന്റെ കാര്യത്തിൽ നിലനിൽക്കുന്നതല്ലെന്ന് ഈ വകുപ്പ് വ്യക്തമാക്കുന്നു.
ആർട്ടിക്കിൾ 370 ഒഴിവാക്കുന്നതോടെ കശ്മീരിന് ഇനി മുതൽ സ്വന്തം ഭരണഘടനയും പ്രത്യേക പതാകയും ഉണ്ടാവില്ല. ജമ്മു കാശ്മീരിലെ ഭൂമിയുടെ ക്രയവിക്രയം ആ സംസ്ഥാനത്തെ ആളുകൾ തമ്മിൽ മാത്രമേ പാടുള്ളൂവെന്നായിരുന്നു നേരത്തെ ഉണ്ടായിരുന്ന നിയമം. ഇപ്പോൾ വരുന്ന മാറ്റങ്ങളോടെ ഈ അധികാരവും ഒഴിവാവും. കശ്മീരിൽ അന്യസംസ്ഥാനത്തുള്ളവർക്കും ഭൂമിക്രയ വിക്രയത്തിന് അവസരം ലഭിക്കും

ജമ്മു കാശ്മീരിലെ സ്ഥിര താമസക്കാരെ നിർണ്ണയിക്കാനും അവകാശങ്ങളും പദവികളും നിർണ്ണയിക്കാനുമുള്ള സംസ്ഥാന സർക്കാരിന്റെ അധികാരമാണ് ആർട്ടിക്കിൾ 35 എ നിർവ്വചിക്കുന്നത്. 1954 ൽ അന്നത്തെ രാഷ്ട്രപതിയുടെ ഉത്തരവ് പ്രകാരം ജമ്മു കാശ്മീർ സർക്കാരിന്റെ അനുവാദത്തോടെയാണ് ഈ വകുപ്പ് ഭരണഘടനയുടെ ഭാഗമായത്.
കശ്മീരിൽ ഭൂമി വാങ്ങുന്നതിനും താമസിക്കുന്നതിനും അവിടുത്തെ ജനതയ്ക്ക് മാത്രമേ അധികാരമുള്ളൂ. ആർട്ടിക്കിൾ 35എ ഒഴിവാക്കുമ്പോൾ കശ്മീരിലെ ഭൂമിവിനിമയ നിയമത്തിൽ ഇതോടെ മാറ്റം വരും. ഇതര സംസ്ഥാനത്തുള്ളവർക്ക് കശ്മീരിൽ സർക്കാർ ജോലിയിൽ പ്രവേശിക്കുന്നതിനോ സ്കോളർഷിപ്പ് നേടുന്നതിനോ നിയമം മൂലമുള്ള വിലക്കുണ്ട്. ഇക്കാര്യത്തിലും ഇനി മാറ്റം വരും.

ജമ്മു കശ്മീർ നിയമസഭയുടെ കാലാവധി അഞ്ച് വർഷമായി ചുരുക്കും. ഇതോടെ രാജ്യം മുഴുവൻ ഇന്ത്യൻ ഭരണഘടന ബാധകമാവും. നിലവിൽ ജമ്മു കശ്മീരിലെ ശ്രീനഗറിലും കാശ്മീർ താഴ്‍വരയിലും നിരോധനാജ്ഞ പ്രഖ്യാപിച്ചിരിക്കുകയാണ്. വിജ്ഞാപനത്തിന് ശേഷം സേനയ്ക്ക് അതീവ ജാഗ്രതാ നിർദേശം നൽകിയിട്ടുണ്ട്. അവസാന നിമിഷം വരെ ബില്ലിലെ വിവരങ്ങള്‍ എന്താണെന്ന് രഹസ്യമായി വെച്ച ശേഷമായിരുന്നു കേന്ദ്ര ആഭ്യന്തര മന്ത്രി അമിത് ഷാ രാജ്യസഭയിൽ ബിൽ അവതരിപ്പിച്ചത്. ബില്ലിനെതിരെ സഭയിൽ പ്രതിപക്ഷത്തിന്‍റെ പ്രതിഷേധം തുടരുകയാണ്.

Recent Post


Related News


National Vision News