National Vision News
 

കശ്മീരിൽ വൻ സൈനിക നീക്കം. ഇതുവരെ 90,000 സൈനികരെ കശ്മീരിൽ വിന്യസിച്ചുവെന്നാണ് റിപ്പോർട്ട്

National Vision News 05:21 PM National News

ജമ്മു കശ്മീർ : കശ്മീരിലെ സാഹചര്യങ്ങളുമായി ബന്ധപ്പെട്ട് കേന്ദ്ര ആഭ്യന്തര മന്ത്രി അമിത് ഷായുടെ നേതൃത്വത്തിൽ പാര്‍ലമെൻ്റിൽ യോഗം തുടരുകയാണ്. ആഭ്യന്തര സെക്രട്ടറി രാജീവ് ഗൗബ, ദേശീയ സുരക്ഷാ ഉപദേഷ്ടാവ് അജിത് ഡോവൽ തുടങ്ങിയവര്‍ യോഗത്തിൽ പങ്കെടുക്കുന്നുണ്ട്. അടുത്ത രണ്ട് ദിവസത്തിനുള്ളിൽ അമിത് ഷാ ജമ്മു കശ്മീര്‍ സന്ദര്‍ശിക്കുമെന്ന സൂചനകളും പുറത്തുവരുന്നുണ്ട്.

ഭീകരാക്രമണ സാധ്യതയുണ്ടെന്ന മുന്നറിയിപ്പിനെ തുടര്‍ന്ന് ശക്തമായ സുരക്ഷയാണ് കശ്മീരിൽ ഒരുക്കിയിരിക്കുന്നത്. അമര്‍നാഥ് തീര്‍ത്ഥാടകരെ ലക്ഷ്യമിട്ട് പാക് ഭീകരര്‍ ആക്രമണം നടത്താൻ പദ്ധതിയിടുന്നുണ്ടെന്ന വിവരത്തിന് പിന്നാലെയാണ് കശ്മീരിൽ സുരക്ഷ ശക്തമാക്കിയത്. ഇതുവരെ 90,000 സൈനികരെ കശ്മീരിൽ വിന്യസിച്ചുവെന്നാണ് റിപ്പോർട്ട്. പൂഞ്ച് മേഖലയിൽ റാപിഡ് ആക്ഷൻ ഫോഴ്സിനെയും ഇന്ന് വിന്യസിച്ചു.

ജമ്മു കശ്മീരിൽ എത്തിയ ടൂറിസ്റ്റുകളോടും തീര്‍ത്ഥാടകരോടും ഉടൻ മടങ്ങാൻ സര്‍ക്കാര്‍ നിര്‍ദ്ദേശം നൽകിയിട്ടുണ്ട്. കശ്മീരിൽ നിന്ന് അധിക സര്‍വീസുകള്‍ നടത്താൻ വിമാനക്കമ്പനികള്‍ തയ്യാറാകണമെന്ന് നിര്‍ദ്ദേശം നല്‍കിയിട്ടുണ്ടെന്നും ഡിജിസിഎ അറിയിച്ചു. 32 ഷെഡ്യൂൾഡ് വിമാനങ്ങളിൽ 5829 പേർ സ്ഥാനത്തു നിന്നും പലായനം ചെയ്തുവെന്ന് ദേശീയ മാധ്യമങ്ങൾ റിപ്പോർട്ട് ചെയ്തു.

അതേസമയം ജനങ്ങള്‍ ആശങ്കപ്പെടേണ്ട കാര്യമില്ലെന്ന് ഗവര്‍ണര്‍ സത്യപാല്‍ മാലിക് അറിയിച്ചു. കശ്‍മീരിൻ്റെ സുരക്ഷക്ക് വേണ്ടിയാണ് അധിക സേനയെ നിയോഗിച്ചത്.മുന്‍കരുതല്‍ എന്ന നിലയ്‍ക്കാണ് എല്ലാവരോടും മടങ്ങാന്‍ ആവശ്യപ്പെട്ടതെന്നും അദ്ദേഹം വ്യക്തമാക്കി. അമർനാഥ് തീർത്ഥാടന പാതയിൽ പാക് നിർമിത കുഴിബോംബുകൾ അടക്കമുള്ള സ്ഫോടക വസ്തുക്കളും ആയുധങ്ങളും കണ്ടെടുത്തിരുന്നു. ഇതേത്തുടർന്നായിരുന്നു സർക്കാർ നിർദ്ദേശം പുറപ്പെടുവിച്ചത്.

Recent Post


Related News


National Vision News