ന്യൂഡൽഹി : വിദേശപണം സ്വീകരിച്ച് ഇന്ത്യയിൽ മതപരിവർത്തനം നടത്തുന്ന സംഘങ്ങൾക്ക് തിരിച്ചടി. വിദേശത്ത് നിന്ന് പണം സ്വീകരിക്കുന്ന എൻ.ജി.ഒയുടെ ഒരംഗം പോലും മതപരിവർത്തന ആരോപണം നേരിട്ടവരാകരുതെന്ന നിർദ്ദേശവുമായി കേന്ദ്രസർക്കാർ. ഇത് സംബന്ധിച്ച് എല്ലാവരും സത്യവാങ്മൂലം നൽകണമെന്നും പുതിയ നിയമത്തിൽ നിർദ്ദേശമുണ്ട്.

കാരുണ്യ പ്രവർത്തനമെന്ന പേരിൽ വിദേശ പണം സ്വീകരിച്ച് വിവിധ എൻ.ജി.ഓകൾ വ്യാപക മതപരിവർത്തനമാണ് നടത്തുന്നതെന്ന ആരോപണം ശക്തമായിരുന്നു. വിദേശ മിഷണാറിമാരുടെ സന്ദർശനത്തിനിടയിൽ നിയമ വിരുദ്ധമായി മതപരിവർത്തനവും പ്രചാരണവും നടത്തുന്നതും സമൂഹത്തിൽ സംഘർഷമുണ്ടാക്കിയിരുന്നു. ഇത് കണക്കിലെടുത്താണ് കേന്ദ്രസർക്കാർ നിയമം കർശനമാക്കുന്നത്.

നേരത്തെ വിദേശ വിനിമയ ചട്ടങ്ങൾ ലംഘിച്ച പതിനെണ്ണായിരം എൻ.ജി.ഒ കൾക്ക് വിദേശ പണം സ്വീകരിക്കുന്നതിൽ കേന്ദ്രസർക്കാർ വിലക്കേർപ്പെടുത്തിയിരുന്നു.കൃത്യമായി കണക്കുകൾ കാണിക്കാത്തതും പണം വകമാറ്റി ചെലവഴിച്ചതുമായ എൻ.ജി.ഒകൾക്കെതിരെയാണ് കേന്ദ്രസർക്കാർ നടപടിയെടുത്തത്. മാത്രമല്ല വിദേശപണം രാജ്യവിരുദ്ധ പ്രവർത്തനങ്ങൾക്കുപയോഗിക്കരുതെന്ന കർശന നിർദ്ദേശവും മോദി സർക്കാർ നൽകിയിരുന്നു.