National Vision News
 

എറണാകുളം , ഇടുക്കി ,പാലക്കാട് ,മലപ്പുറം ,കോഴിക്കോട് വയനാട് ,കണ്ണൂർ ;റെഡ് അലേര്‍ട്ട്, മഴക്കെടുതിയിൽ ഇതുവരെ മരിച്ചവരുടെ എണ്ണം 42 ആയി.

National Vision News 08:53 AM Local News

തിരുവനന്തപുരം: സംസ്ഥാനത്ത് മഴക്കെടുതിയിൽ ഇതുവരെ മരിച്ചവരുടെ എണ്ണം 42 ആയി. ഇന്ന് എറണാകുളം , ഇടുക്കി ,പാലക്കാട് ,മലപ്പുറം ,കോഴിക്കോട് വയനാട് ,കണ്ണൂർ എന്നീ ഏഴ് ജില്ലകളിൽ റെഡ് പ്രഖ്യാപിച്ചിട്ടുണ്ട്. ഈ ജില്ലകളിൽ അതിതീവ്ര (Extremely Heavy 24 മണിക്കൂറിൽ 204 mm ൽ കൂടുതൽ മഴ) മഴയ്‌ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. പത്തനംതിട്ട, ആലപ്പുഴ, കോട്ടയം,തൃശ്ശൂർ,കാസർഗോഡ് എന്നീ ജില്ലകളിൽ ഓറഞ്ച് അലേര്‍ട്ടും പ്രഖ്യാപിച്ചതായി കാലാവസ്ഥാ നിരീക്ഷണ കേന്ദ്രം അറിയിച്ചു. 
കേരള തീരത്ത് പടിഞ്ഞാറൻ ദിശയിൽ നിന്ന് മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ ശക്തമായ കാറ്റ് വീശാൻ സാധ്യതയുണ്ട് . ആയതിനാൽ മത്സ്യത്തൊഴിലാളികൾ കടലിൽ പോകാൻ പാടില്ലെന്ന് ദുരന്ത നിവാരണ അതോറിറ്റി അറിയിച്ചു. 
സംസ്ഥാനത്ത് ഇന്നലെ വരെ 738 ദുരിതാശ്വാസ ക്യാമ്പുകകള്‍ തുറന്നു. വിവിധ ജില്ലകളിൽ നിന്ന് ഒരു ലക്ഷത്തോളം പേരെ ദുരിതാശ്വാസ ക്യാമ്പുകളിലേക്ക് മാറ്റിപ്പാര്‍പ്പിച്ചു. അതേസമയം വടക്കൻ കേരളത്തിൽ ഉരുള്‍പ്പൊട്ടൽ ഭീഷണി തുടരുകയാണ്. ഉരുള്‍പ്പൊട്ടലുണ്ടായ വയനാട് പുത്തുമലയിലും മലപ്പുറം കവളപ്പാറയിലും രക്ഷാപ്രവര്‍ത്തനം തുടങ്ങുന്നതിന് കനത്ത മഴയും മണ്ണിടിച്ചിലും തടസമാകുകയാണ്. കവളപ്പാറയിൽ കാണാതായവര്‍ക്കായുള്ള സൈന്യത്തിൻ്റെ നേതൃത്വത്തിലുള്ള തെരച്ചിൽ രാവിലെ തുടങ്ങും. ഉരുൾപ്പൊട്ടലിൽ പ്രദേശത്തെ അമ്പതിലേറെ പേരെ കാണാതായെന്നാണ് റിപ്പോര്‍ട്ട്.

രക്ഷാദൗത്യം എപ്പോള്‍ തുടങ്ങാനാവുമെന്നതിൽ ആശങ്കയുണ്ടെന്ന് വയനാട് സബ് കളക്ടര്‍ എൻ എസ് കെ ഉമേഷ് പറഞ്ഞു. സൈന്യത്തിനും എൻഡിആര്‍എഫ് സംഘത്തിനും പുത്തുമലയിലേക്ക് എത്താൻ സാധിക്കുന്നില്ലെന്നും രക്ഷപ്രവര്‍ത്തകരുടെ ജീവനുപോലും അപകടമുണ്ടാകുന്ന സ്ഥിതിയാണെന്നും അദ്ദേഹം വ്യക്തമാക്കി.

കാലവര്‍ഷക്കെടുതിയില്‍ പെട്ടവരെ സഹായിക്കാൻ സംസ്ഥാന പോലീസ് ആസ്ഥാനത്ത് കൺട്രോൾ റൂം സജ്ജമാക്കിയെന്ന് സര്‍ക്കാര്‍ അറിയിച്ചു. 112 എന്ന നമ്പറിലേയ്ക്ക് വിളിച്ച് സഹായം ആവശ്യപ്പെടാം.

Recent Post


Related News


National Vision News