National Vision News
 

ഇടുക്കിയില്‍ മണ്ണിടിഞ്ഞ്പലപ്രദേശങ്ങളും ഒറ്റപ്പെട്ടു; മണ്ണിടിഞ്ഞ് ഒന്നര വയസ്സുകാരി മരിച്ചു.

National Vision News 03:17 PM Local News

കൊച്ചി: ഇടുക്കിയില്‍ മണ്ണിടിഞ്ഞ് ഉണ്ടായ അപകടത്തില്‍ പിഞ്ചുകുഞ്ഞ് മരിച്ചതായി റിപ്പോര്‍ട്ട്. മൂന്നാറിന് സമീപം ചിന്നക്കനാലില്‍ ആണ് അപകടം ഉണ്ടായത്. ഒന്നര വയസ്സുള്ള മഞ്ചുശ്രീ എന്ന പെണ്‍കുഞ്ഞാണ് മരിച്ചതെന്ന് പ്രാദേശിക വൃത്തങ്ങള്‍ റിപ്പോര്‍ട്ട് ചെയ്‍തു. 
ചിന്നക്കനാല്‍ ചാന്‍സലര്‍ റിസോര്‍ട്ടിന് പിന്നിലുള്ള ഏലത്തോട്ടത്തില്‍ ആണ് വീടിന് മുകളില്‍ മണ്ണിടിച്ചില്‍ ഉണ്ടായത്. മൂന്ന് പേര്‍ക്ക് പരിക്കുമുണ്ട്. എസ്റ്റേറ്റ് തൊഴിലാളികളായ രാജശേഖരൻ - നിത്യ ദമ്പതികളുടെ മകളാണ് മരിച്ച മഞ്ചുശ്രീ. 
ജെസിബി ഉപയോഗിച്ച് മണ്ണുമാറ്റിയാണ് കുട്ടിയെ പുറത്തെടുത്തത്. മൃതദേഹം രാജകുമാരി പ്രാഥമിക ആരോഗ്യകേന്ദ്രത്തിലെ മോര്‍ച്ചറിയിലേക്ക് മാറ്റി. ശാന്തന്‍പാറ പോലീസ് അന്വേഷണം ആരംഭിച്ചു.

സംസ്ഥാനത്ത് കനത്ത മഴ തുടരുകയാണ്. ഇടുക്കി ഉള്‍പ്പെടെ നാല് ജില്ലകളില്‍ റെഡ് അലേര്‍ട്ട് പ്രഖ്യാപിച്ചിട്ടുണ്ട്. ഇടുക്കിയില്‍ നാളെയും റെഡ് അലേര്‍ട്ട് ആണ്. എട്ട് ജില്ലകളില്‍ ഓറഞ്ച് അലേര്‍ട്ടും പ്രഖ്യാപിച്ചു.

എല്ലാ താലൂക്കുകളിലും 24 മണിക്കൂര്‍ പ്രവര്‍ത്തിക്കുന്ന കൺട്രോള്‍ റൂമുകള്‍ തുറന്നിട്ടുണ്ട്. അടിയന്തര സാഹചര്യങ്ങളിൽ ബന്ധപ്പെടാനായി 1077 എന്ന എമര്‍ജൻസി നമ്പര്‍ തുടങ്ങിയതായി സംസ്ഥാന ദുരന്ത നിവാരണ അതോരിറ്റി അറിയിച്ചു. ജില്ലയ്ക്ക് പുറത്തു നിന്ന് വിളിച്ചാൽ അതത് ജില്ലകളിലെ എസ് ടി ഡി കോ‍ഡ് ചേര്‍ത്താണ് ബന്ധപ്പെടേണ്ടത്.

ഇടുക്കിയില്‍ പലപ്രദേശങ്ങളും ഒറ്റപ്പെട്ടു 

മണിമലയാര്‍ കരകവിഞ്ഞൊഴുകിയതോടെ മൂന്നാര്‍ ടൗൺ ഒറ്റപ്പെട്ട നിലയിലാണ്. മൂന്നാര്‍ കോളനി റോഡിലെ വീടുകളിൽ വെള്ളം കയറി. കഴിഞ്ഞ പ്രളയകാലത്തിന് ശേഷം നിര്‍മിച്ച മൂന്നാര്‍ പെരിയവരൈയിലെ താത്കാലിക പാലം തകര്‍ന്നതോടെ മറയൂര്‍, ഉദുമൽപ്പേട്ട് മേഖലകളുമായുള്ള ബന്ധം വിച്ഛേദിക്കപ്പെട്ടു. ഇതോടെ മറയൂര്‍ മേഖല ഒറ്റപ്പെട്ട നിലയിലാണ്. കല്ലാര്‍ മാങ്കുളം പാതയിൽ മണ്ണിടിഞ്ഞതോടെ ഇവിടേയ്ക്കുള്ള ഗതാഗതവും തടസ്സപ്പെട്ടു. ജില്ലയിൽ താഴ്ന്ന പ്രദേശങ്ങള്‍ പലതും വെള്ളക്കെട്ടിലാണ്. വണ്ടിപ്പെരിയാര്‍ തേങ്ങാക്കല്ലിൽ ചപ്പാത്ത് റോഡ് ഒലിച്ചു പോയി.

ഇടുക്കി ചെറുതോണിയ്ക്ക് സമീപം കീരിത്തോട്ടിൽ ഉരുള്‍പൊട്ടി ഗതാഗതം തടസ്സപ്പെട്ടു. അടിമാലി - രാജാക്കാട് റൂട്ടിൽ പന്നിയാര്‍കുട്ടിയിലും റോഡിലേയ്ക്ക് മണ്ണിടിഞ്ഞു. കോട്ടയം - കുമളി റൂട്ടിൽ ബസ് സര്‍വീസ് നിര്‍ത്തി വെച്ചിട്ടുണ്ട്. ജലനിരപ്പ് ഉയര്‍ന്നതോടെ ജില്ലയിൽ കല്ലാര്‍കുട്ടി, പാംബ്ല, മലങ്കര ഡാമുകള്‍ തുറന്നിട്ടുണ്ട്


Recent Post

National Vision News